江若琳（Elanne）前晚平安夜，率領師弟Square出席「健荃城迎聖誕」活動，已有多年沒拖拍的Elanne，直言希望早日覓得真命天子，她笑說：「都dry咗好幾年，上年原本有個男仔出現，點知聖誕前夕冇咗，（好傷心？）幾啦，（係咪圈內人？）同呢行有啲關係嘅。不過雖然冇情人，但我就快開演唱會，所以依家冇拖拍都係好事，可以心無雜念。」此外，她透露聖誕不會約朋友過，因朋友們都一雙一對地拍拖。而她因沒有時間，故沒有準備禮物給朋友，更坦言：「好內疚囉！同埋估唔到同事會送禮物畀我，所以趁聖誕節正日（即昨日）去買回禮，同買最大份嘅禮物畀媽咪！」同場的張智霖則透露聖誕要拍劇，無時間陪老婆袁詠儀和兒子。