早前在金馬獎、金像獎及其他電影頒獎禮封帝的家輝，昨日再憑《証人》五度封帝，全程風騷滿面。他說：「我都唔肯定係咪第五個獎，應該差唔多。呢個獎係第一屆搞，極具意義。（畫上完美句號？）我仲有亞太影展要去，每次入選我都想攞獎。得獎唔係我個人榮譽，好多朋友恭喜我，我都會話『好彩』，我可以遇到好導演、劇本、拍檔嗰種好彩。（做咗影帝大壓力？）唔會，如果吓吓提住自己，就會over咗。」
鮑起靜人生大豐收
家輝又稱：「《証人》導演林超賢話動作戲佢拍得差唔多，拍埋《綫人》想拍女性電影，佢喺《証人》入面把刀磨得咁利，我又同佢建立咗信任、感情，好難得，有啲嘥囉！」
《天水圍的日與夜》在頒獎禮囊括最佳導演、最佳女主角、最佳女配角、最佳編劇等多個獎項，成為大贏家。身為《天》片女主角的鮑起靜，與內地演員蔣雯麗雙雙封后，鮑起靜興奮地說：「《天》片令我人生大豐收，上天眷顧我，我好感恩，可以畫上完美句號。（點慶祝？）唔啦，排舞台劇好忙。（亞視開天水圍劇？）如果開一定有我份，係處境劇就好。（亞視高層動盪？）有反面嘢係好事，好過唔明朗、曖昧，嗌一場交咪仲好。（演員好慘？）都好多年啦！」
許鞍華怕冇人投資
同樣憑《天》片奪得「最佳女配角」的陳麗雲說：「《天》片令我此生無憾，改善咗我工作同生活。」導演許鞍華則說：「好開心《天》片幫我攞咗好多獎，下齣想拍禪修題材，但擔心搵唔到投資者，或者會再搵王晶合作。」
另外，內地演員王學圻、余少群則憑英皇投資內地電影《梅蘭芳》分別贏得「最佳男配角」、「最佳男新人」，但因工作未能出席。
第一屆優質華語電影大獎
最佳導演
許鞍華 《天水圍的日與夜》
最佳編劇
岸西 《親密》
呂筱華 《天水圍的日與夜》
最佳男主角
張家輝 《証人》
最佳女主角
鮑起靜 《天水圍的日與夜》
蔣雯麗 《立春》
最佳男配角
王學圻 《梅蘭芳》
最佳女配角
陳麗雲 《天水圍的日與夜》
最佳男新人
余少群 《梅蘭芳》
最佳女新人
徐嬌 《長江７號》
十部優質華語電影排名
港台地區影評人票選
1.《天水圍的日與夜》
2.《海角七號》
3.《葉問》
3.《非誠勿擾》
3.《九降風》
6.《文雀》
7.《証人》
8.《親密》
9.《愛失償》
10.《立春》
內地影評人票選
1.《天水圍的日與夜》
2.《立春》
3.《梅蘭芳》
4.《海角七號》
5.《愛失償》
6.《葉問》
7.《千鈞。一發》
8.《情非得已之生存之道》
8.《我不賣身．我賣子宮》
10.《文雀》
文：影視組