前晚「理大愛心暖香江」於金鐘萬豪酒店舉行慈善晚宴，無綫總經理陳志雲更為善事大開金口，夥拍鄺美雲合唱《只有情永在》，成功為大會籌得七十多萬。王菀之在記者前扁嘴說：「好嬲張敬軒！因為佢又再亂噏嘢！」之後軒仔現身，王菀之竟面向牆，並喝令他不准行近，軒仔即向一頭霧水的記者們解釋說：「我喺電台度話有次我喺台灣工作，王菀之情緒唔好，就打電話畀我，嗌咗三個鐘頭交，搞到我同佢啲歌迷都誤會佢，以為佢無理取鬧。其實係我借佢過橋，幫我個唱宣傳。你胸部……唔係，應該係胸懷廣闊，你大人有大量唔好嬲！」王菀之聽罷態度竟180度轉變，說：「我哋又冇隔夜仇。」記者笑她變得快，她自認大方，卻被軒仔反笑她一張臉才是「又大又方」。

先黑面	周麗淇亦是慈善晚宴座上客。	陳志雲與鄺美雲首度合唱。

幫拖義不容辭

王菀之又稱數年間在精神上支持和幫助軒仔：「我係佢發洩對象！不過佢體力上幫到我，好似半夜三更我屋企音響有問題，佢着住睡衣同唔化妝，好似殭屍咁嚟搵我，佢對我好好！」軒仔插嘴笑說：「你講清楚發洩乜！」

與陳志雲密斟

此外，軒仔與陳志雲在晚宴上密密傾，其後軒仔解釋：「陳生對我哋樂壇歌手好好，話公司之間嘅問題等公司去解決。（咩問題？）係版稅收入有少少意見分歧啫。其實電視台同電台都會發生，最後亦會圓滿解決，原則上係冇問題。不過真係好感激陳生講呢番說話，因為對歌手嚟講係好大信心。如果公司採取行動，作為旗下歌手梗係要義無反顧支持，無綫係我哋歌手所需嘅平台，希望到最後會雙贏。」

文：名人組