啲人都話做明星着數多，尤其係「紅」嗰隻。近期被指因拍劇同楊思琦鬧不和嘅陳鍵鋒日前獨自到旺角買汽車用品，見佢逛咗一陣就走埋去女售貨員身邊，諗住對方會熱情招呼，點知售貨員完全當佢透明，最後冇癮黑住面離開。
不經不覺陳鍵鋒(Sammul)已經出道十年，由電台DJ轉型到幕前做演員，喺無綫拍過多套電視劇，如《衝上雲霄》、《學警狙擊》、《律政新人王》等，套套都係做男主角，仲不時擔任節目主持，都算有啲知名度啦！
售貨員懶理
日前晚上9時半，八太見到Sammul獨自揸住佢駕寶馬座駕去到旺角黑布街，將座駕停泊喺路邊嘅錶位，錶都唔入，幾蚊都慳，然後急急腳行咗去附近一間專門售賣汽車用品及精品嘅舖頭。由於舖頭內精品款式眾多，於是Sammul索性翹埋雙手慢慢睇，冇幾耐見佢好似睇中咗其中一件，但又唔知件貨品啱唔啱自己架車，於是走近女售貨員身邊，諗住對方會熱情招呼，點知個售貨員好唔識做，掛住耷低頭睇雜誌，完全當佢透明，眼尾都冇望過佢一眼。話晒Sammul都算係無綫小生呀！咁大隻檸檬送到埋身，梗係無癮啦！
轉戰另一店
既然呢間冇人騷佢，於是佢行多幾步去街尾另一間再睇過。不過，呢間舖頭嘅Sales姐姐就醒目得多，當Sammul逛咗幾個圈，呢位Sales姐姐即刻放低手頭上嘅工作，好殷勤咁向Sammul逐一講解。傾咗一陣，Sammul仲帶對方去睇吓自己架車，等Sales姐姐挑選一款合適嘅用品畀佢。最後Sammul好開心咁拎住一個車套同一個行車證貼紙離開。
