羅仲謙日前在籌款節目《歡樂滿東華》中，成功跟官恩娜表演踩單車過獨木橋等高難度動作，令他甚為興奮，問到謙仔綵排時的辛酸史？他即謂：「雖然有一個月時間練習，但因當時我要拍劇同綵排舞台劇，所以練單車嘅時間唔多，惟有晚晚練到凌晨兩點幾先走，但係我都堅持每日做gym，因為貪靚嘛！」謙仔表示因練車而弄至大髀、手心及骹位勞損：「不過受傷都係其次，最驚表演完觀眾會覺得毫無難度，咁就唔抵喇！」
說到一月公演的舞台劇，謙仔直言相當緊張：「今次係我首次做舞台劇，所以好有壓力，劇中會同焦媛有親密動作，但就會用舞蹈嚟表達。（聖誕點過？）同咗導演講，之前排得幾辛苦都冇問題，最重要係聖誕有得放假，因為呢幾個月實在太緊張啦，到時可能會同朋友去玩吓啦！」