Baby升呢赴日本發展，與William分隔兩地聚少離多，加上傳出鄭中基和黃曉明介入，令兩人的關係危危乎。William在本月初暗示為事業而犧牲愛情，而Baby則在網誌中以「該失去的始終都會失去」暗示「分訊」，但兩人昨日一改口風，Baby寫網誌表示與天蠍座有緣，暗示與William有緣，而William亦直指與Baby以電郵連繫，兩人疑似翻撻成功，在線上隔空傳情。

昨日Baby更新網誌發表感性宣言，指雙魚座的她跟天蟹座（即天蠍座）最配合，每次遇上困難都有天蠍座的人出手相助，成為她的依賴，而William正是天蠍座，她似乎若有所指，暗示不能失去William。

不需識新好友

至於William方面，昨日出席「十大中文金曲」的「最有前途新人獎」候選新人拉票行動時，心情明顯不錯，與同場的G.E.M.和洪杰等人有傾有講，又睇好新人王梓軒、余翠芝及徐子珊。當問到與Baby盛傳分手後可想結識新「好朋友」？他即大耍太極，表示冇識新「好朋友」的需要，亦坦言與Baby在網上傳情：「久唔久都有聯絡，以前都會喺Online傾偈，但成日都撞唔啱，又冇時間，依家改用E-mail聯絡。」

文：專案組