李克勤即將榮升第二任父親，前晚他出席祖兒的首映禮獲傳媒恭賀時難掩喜悅之情。問到是男是女時，克勤表示：「未照喎，男女都冇所謂！」講到有計劃還是意外之喜？克勤笑言：「冇諗呢個問題，唯一可以講係自從公布咗收到好多人嘅恭喜，問有乜方法喎，覺得我好得咁！我只係工作時工作，工作之後都係『工作』囉，大家明就明啦！（阿倫教嘅？）多多少少都有，佢成日講乜嘢倒掛金鈎、衝力射球，都係想叫大家多做『運動』啫。」
提到四大唱片公司包括環球因無綫不付歌曲版稅有意進行封殺行動，克勤謂：「我都係公司一粒棋子，公司決定都要支持，但我尷尬位，同無綫關係好，有時又會同陳志雲食飯，商業上決定係點，朋友都會繼續食飯嘅。」
