曾推出唱片的區俊濤將進軍時裝界，為母親打理時裝生意，榮升「老闆」的濤濤滿腹大計：「媽咪本身喺內地設廠幫好多大牌子做衫，呢幾年經濟起飛，媽咪話肥水不流別人田，所以諗住自己出衫兼零售！」
由於區媽媽忙於打理內地製衣廠，香港店舖順理成章交濤濤「打骰」，他表示：「我負責傾品牌返嚟同搵人設計，有時都會加插意見，始終後生仔嘅潮流觸覺好啲！」由於生意剛開始，濤濤也不急於賺大錢，只希望吸收更多實戰經驗。不過，濤濤聲言不會放棄歌唱事業：「今個月喺HMV放自己嘅demo歌畀歌迷聽，睇吓佢哋鍾意咩類型嘅嘢，下年中會推新專輯！」
