憑《學警狙擊》中「藥煲」一角為人熟悉的梁嘉琪，除了演戲及主持外，連擔任模特兒亦難不倒她，早前她以友情價為友人拍時裝宣傳照，輕鬆地擺出趴地、拗腰及單腳企等高難度動作，獲攝影師大讚有當模特兒的天分。
嘉琪雖然不是專業模特兒，不過由於她擁有一副纖瘦的身形，加上樣子清純可愛，所以不少廣告商都喜歡找她擔任業餘模特兒拍攝平面廣告。
「舞」足八粒鐘
早前，嘉琪更捱義氣為友人開設的時裝店拍攝了一輯平面廣告，雖然只是象徵式收取車馬費，但專業的她拍照時依然施展渾身解數、任勞任怨，任攝影師「舞」足八個小時，趴地、拗腰、單腳企及全身傾斜四十五度的甫士都一一順利完成。鏡頭前嘉琪入型入格，她卻笑謂拍完後有苦自己知：「嗰啲動作全部要用陰力，所以拍完之後，無論腰、膊頭同腳都好痠軟。」
新人乜都要試
雖然如此，由於攝影師盛讚嘉琪有做模特兒的潛質，令她喜上眉梢：「個攝影師可能想鼓勵我啦，竟然讚我某啲動作有專業模特兒嘅水準喎，真係開心到死。（有冇真係諗過進軍模特兒？）哈哈，順其自然啦，我仲係新人，梗係乜都要試吓啦！」
文：影視組