黃伊汶（Emme）代理腕錶品牌Galtiscopio，身邊朋友對她突如其來的行為大惑不解，但她此舉亦是受朋友所啟發，她說：「我好多朋友都覺得我隻錶睇唔清楚時間，正正呢個原因，我攞咗呢隻錶。巿面上有好多腕錶都係追求精準清晰，但其實人係咪一定樣樣嘢都要咁清楚？有啲人太着意時間過得快定慢，咁樣會好攰，其實有冇停落嚟好好欣賞身邊人與事，享受人生呢？呢隻錶喺錶面上都會加入唔同嘅玩具，令人睇落好開心、好有氣氛，感覺係time to enjoy，唔好只係睇時間做人，畀時間縛住。」
意大利一見鍾情
Emme在一次機緣巧合下獲得此錶代理，她說：「我有次去意大利一間店舖買嘢，喺店嘅一個小角落見到呢隻錶面，一望就愛上，之後咁啱有個朋友識得呢個設計師，同佢傾合作。我會再重新包裝，我從冇做過marketing，依家樣樣都要學。」
初次從商，Emme認為最重要是學識堅持，她說：「堅持好重要，初初做時都有好攰、好失落嘅時候，乜都要慢慢傾，有時真係好辛苦，但又唔可以停，成日諗有啲乜可以做得好啲，有啲乜仲未做，所以依家開始好欣賞生意人。以前唱歌跳舞都會好攰，但感覺好唔同，做生意要面對好多層面，由冇變有，加上我鍾意做勞力嘅事，只要有成績出嚟，成功感好大好開心。」
成年人過分執着
Emme代理的腕錶充滿童真，她表示戴在手上，令她勾起不少童年回憶，她說：「小朋友嘅情感係最直接，喜怒盡情表露，而且成日都可以咁開心，係因為佢哋唔會執着；反而人大咗，不斷追求，有欲望，如果得唔到，令佢哋唔開心，點解做人要咁執着？」
快活不知時日過
Galtiscopio的創作意念來自「享受時間」，款式充滿童真，首個系列「La Giostra I」以「童真的木馬」為題，既時尚又玩味十足，把玩具融入腕錶之中，人手製作的「立體水晶木馬」栩栩如生地放到錶面上，加上形狀不同的水晶包圍着錶圈，令整個設計閃閃生光。當看時間時，要通過水晶木馬，仔細看才能清楚，時間若隱若現，是品牌的特色之一。
此錶設計靈感來自一個小女孩，設計師有天見到小女孩把心愛的玩具貼在腕錶上，令她時刻享受着忘卻時間所帶來的快樂和自在。
設計師把這情景變為真實，品牌獨特設計令佩戴者忘卻時間綑綁，並且希望盡情享受當下的美好，為枯燥乏味的時間添上色彩。
採訪：Jessica Lam 攝影：劉智源 髮型：Chin G 場地：Beer Bar（蘭桂坊）