狄易達較少度過甜蜜浪漫的聖誕節，但熱愛跳舞的他亦不愁寂寞，因為他必定與舞同過。他喜歡以跳舞紀念每一個聖誕節，否則會覺得枉過，瘋狂的程度真是無人能及。
狄易達每逢聖誕節都會熱辣辣地過，不過並不是與熱戀中的情人過節，而是不停做騷，以跳舞騷去紀念聖誕節：「年年聖誕節都係做騷咁過，喺唔同嘅騷度撞番啲朋友，同佢哋有好多共同嘅回憶，好似02年我去咗比賽，04年喺旺角西洋菜南街做品牌騷，由街頭跳到街尾，而05年我就喺廣東道做大型嘅戶外騷。」
唱情歌冧女
今年的聖誕節，他將會與一班舞功了得的歌手一齊過，包括EO2及HotCha等。回想昔日的聖誕節，狄易達總是與騷有緣，但卻缺乏女性緣：「中學時都有拍拖，但通常節日就冇女朋友一齊過囉！」最浪漫的一次也是在表演中發生：「中學嗰時做表演嘉賓，唱咗首《一生中最愛》畀追緊嘅女仔聽，冇指明係唱畀佢聽，不過係人都知㗎，佢都開心嘅，但就冇乜反應。」
想開個人騷
狄易達自認不懂追女仔，以前只會過簡單的拍拖生活：「都係一齊拖住手，放吓狗，咁已經好開心。」縱使公司鼓勵他結識多點女性朋友，但他的聖誕願望卻是與事業和健康有關：「期望未來可以用個人名義做跳舞騷，聽我啲歌嘅人，大個都會繼續聽我唱歌。另外希望身體好啲，因為今年皮膚敏感，嚟緊可以瞓多啲，唔好好似依家咁成日唔夠瞓。」
文：專案組
攝：攝影組
髮型：Blackie@hairlobby
服裝：BEP、Reebok