Miki最近接拍電台劇集《沒有牆的世界》，周俊偉扮演她的男友，有場戲講兩人去潛水，Miki卻因此失聰了！拍攝當日，穿起潛水裝的Miki英姿十足，怎知她卻不懂游水，完全得個樣，兼且氧氣筒太重，身材嬌小的她孭起後不勝負荷，連企都企唔直，要工作人員從後撐住。

鍾意水上活動

Miki說：「唔止氧氣筒重，連腰帶都好重，我好怕會墜落去，連吸氣都好複雜，正常用鼻吸，但潛水就要用口。」她又謂雖不懂游水，但就好鍾意玩水上活動：「平時只去泳池玩，唔敢去沙灘，所以今日都有啲驚驚哋。（咁大膽？）好玩嘛，本身有興趣學潛水，但拍呢部劇之後，知道潛水超高風險就有啲驚，即刻想縮沙。」

唔想做二打六

落水之後，由於有教練和周俊偉在旁傍住，水深只及心口位置，雙腳能掂地，Miki才定下心來，不過，Miki浸在水中拍了幾近一小時，上水後即大叫好凍：「好緊張呀，好大壓力，好彩踩到地都冇咁驚，（搵命博？）自己想試吓，今次係個好經驗，我唔想再做行行企企角色，而且咁多工作人員睇住，唔會有生命危險。」

採訪：音樂組