跳舞組合HotCha日前在旺角為新碟舉行簽名會，半百歌迷到場支持，向來親民的她們與歌迷合照自然冇托手，但成員Regen難忍搞搞震本色，不時扮鬼臉玩自拍，又為歌迷寫下搞笑留言，氹得歌迷唔捨得走！
剛推出新碟《Shall We Dance Shall We Love》專輯的跳舞組合HotCha，日前在旺角舉行簽名會，半百歌迷提早一小時到場守候。愈趨成熟的HotCha，以型女造型到場，歌迷即狂叫打氣！簽名期間，有歌迷要求合照，HotCha都冇托手肘，更熱情地面貼面合照，表現親民！向來鬼馬的成員Regen，簽名會期間以手機自拍留念。
趁機掃碟
首次見到「親生仔」的HotCha，亦趁機購入新碟，成員Crystal謂：「我哋之前都冇見過隻碟，問公司都話冇晒貨，所以我哋要買番呀，今次隻碟有兩個版本，歌迷鍾意白色豪華版多啲，可能望落自然、舒服啲！（套衫似睡衣？）唔係晚裝嚟架咩？可能呢個版本感覺柔和，所以好似靚啲咁！」
吸取經驗
三女感謝歌迷支持，希望能多與歌迷見面，成員Winkie說：「其實我哋好想收集歌迷對隻碟嘅意見，不過佢哋好少上網留言，所以一定要同佢哋見多啲，當面問下佢哋先得！」HotCha更有意舉行迷你演唱會：「真係好想開，吸取現場經驗，不過依家開嘅話就太趕，希望可以開個音樂會先啦！」
文：音樂組
攝：馬永堅