近日頻頻以跳舞形象示人的江若琳，昨日為其首個演唱會舉行記招，罕有透視晒小蠻腰，又與排舞師Sunny Wong大跳貼身舞。為個唱積極減肥的她進度理想，但上圍仍「力保不失」，她更揚言到時會挑戰性感極限！
「小公主」江若琳昨日召開記者會，宣布明年一月十五日於九展舉行首個演唱會「MY FIRST SHOW 2010演唱會」，正進行地獄式修身的她，昨日罕有以透視裝現身，大晒廿二吋小蠻腰，實行為個唱的終極性感小試牛刀！
早一晚開始禁食
江若琳自爆為以最佳狀態示人，前晚六時開始已禁食：「好肚餓呀，不過第一次露晒成條腰畀人睇，所以驚一食嘢個肚腩走出嚟，我仲請咗個私人教練每日同我做兩個鐘頭Gym。（瘦咗幾多？）條腰瘦咗兩吋，希望可以練到有腹肌。（上圍有冇縮水？）唔係好覺，不過一向都唔勁，應該冇乜大分別啦！（到時再性感啲？）總之有嘢睇啦，會挑戰極限，不過當然唔可以拋胸啦！」
江若琳又與著名排舞師Sunny Wong預演貼身舞，她謂：「我都係第一次着四吋半高踭鞋跳舞，尋日練嘅時候，搞到腳板底都損晒、甩晒皮，返到屋企要即刻用鹽水浸腳消炎，不過為咗演唱會都值得嘅！」
請緋聞男友睇騷
她透露已邀得林俊傑擔任個唱嘉賓，亦會請好友鍾舒漫、三哥苗僑偉及三嫂戚美珍以及兩位緋聞男友吳卓羲及周柏豪到場欣賞。
由於演唱會部分收益將撥捐健康快車，問她可會擔心「白做」？江若琳直言不擔心：「只係捐部分啫！（加場？）未知呀，不過開到一場已經好滿足。」
文：音樂組