陳志雲日前上載一張與容祖兒（Joey）、古巨基及英皇高層霍汶希的飯局相，即惹「傾獎」疑雲。Joey跟基仔前晚異口同聲表示只是普通飯局，絕不牽涉工作，Joey更笑言不會因旁人胡亂猜測而留在家開罐頭。
Joey、基仔、Ana R.、周汶錡、莊思敏等前晚出席雜誌頒獎禮暨晚宴，活動由胡敏珊旗下手錶Chouette贊助。獲頒的「Fashion with Heart」大獎的基仔及祖兒盛裝出現，二人大方承認曾出席「志雲飯局」。
畀心機做好自己
Joey說：「間唔中都會食飯，交個朋友。（唔怕敏感？）睇你點諗，舊時會避忌同敏感，依家冇所謂，相信好多人同佢食，唔通我避晒困係屋企開罐頭？」問到對無綫的「最受歡迎女歌星」有否信心？Joey即說：「冇。」記者笑她不夠其他歌手賣力拍特輯，她就哈哈笑謂：「機會率低啲，我好畀心機做自己，希望大家睇到。」
而Joey以「正」形容「亞太區最受歡迎女歌星」及「最受歡迎女歌星」兩大獎，她說：「兩個都正，畀邊個都開心，唔畀都開心。」
基仔有排未結婚
至於基仔就表示與志雲食飯是年中的事，他說：「純粹普通一個飯局，唔牽涉任何工作。（話你攞硬男歌星？）呢個世界冇嘢係必然。（傳無綫頒男歌星畀你係想你宣布婚訊？）我有排都未結婚。」
文：音樂組