前晚Joey身穿Alexander Wang西裝褸出席頒獎禮，露前又露後，她笑言為免春光乍洩要挺直胸膛做人。問她是否真空上陣？Joey笑說：「好難唔係！（真材實料？）我只係梅菜蒸瘦肉！」

放大圖片	阿Sa直言多得經理人Mani提醒，才戒掉大花筒性格。	傅穎前晚亦有現身頒獎禮。

黐膠紙造成血痕

Joey否認為轉形象而走性感，更自嘲身材平平無奇如洗衫板：「我對自己好有信心，對呢個洗衫板好自豪，喺特別日子我就會攞出嚟！我覺得幾型，兩個物體（缽仔糕）放喺Deep V度，我好唔鍾意，唔好睇！（頒獎禮行乜路線？）頒獎禮我多sponsor，我係要靚，而唔係Deep V行先，成日拎出嚟就唔矜貴，一年一次啦！」

Joey又透露為了性感而加添兩道紋身：「係黐膠紙黐成血痕造成，因為我每次都會好大力，一下咁扯甩膠紙，我一啲都唔錫身，唔似啲人用lotion搽喺膠紙上先扯。不過，個代價係值得，因為安全囉！」

阿Sa戶口剩七蚊

至於蔡卓妍（阿Sa）身穿Vivienne Westwood服飾亮相，她自爆以前是個大花筒：「我都幾鍾意使錢，每季花大約六位數字。我係個衰女包，以前真係好誇張，我一啲錢都儲唔到，每個月賺幾多使幾多，我試過銀行用剩七蚊，櫃員機㩒唔到，就走咗去超級市場用埋嗰七蚊。都係得Mani（霍汶希）點醒我，佢話以前有個女星好紅，成日都買衫，後來唔紅就攬住啲紙袋喊。」

阿Sa又表示除買股票外，還會買樓投資：「股票只係買少少，買樓就實際又保值。」問到她的dream house？她表示希望有花園讓愛狗散步，至於將來婚後會否與老爺奶奶同住，她笑說：「冇諗咁長遠喎！」

文：名人組