本文重點
王菲又傳復出，萬眾期待她的天籟之音再現樂壇，楊千嬅聽到傳聞更興奮大叫：「嘩！開心到死，好鍾意佢，咁型，啲歌又好聽，最鍾意佢嗰首《靜夜的單簧管》，阿菲唔單止唱歌，做戲都好型，好有自己風格，佢係一個好有深度嘅人，總之一個字——正！」
至於與王菲同經理人的陳奕迅則說：「真係唔知佢復出喎，亦冇問過公司，如果佢真係復出，就係樂迷一大福氣。」而王菲好友劉嘉玲日前大表支持：「王菲冇退出過，只係去生孩子，作為好朋友，我尊重佢亦支持佢，作為觀眾，我希望佢再出來唱歌。」
王菲御用髮型師Elaine：「佢復出梗係開心啦，佢咁有才華，唱歌咁好聽。」
林建名嫌乸脷
至於大名娛樂負責人林建名表示冇聽過王菲復出開騷，不過都支持，但當知道傳聞7,500萬唱10場，他即搖頭說：「太勁啦，我哋未必有能力畀呢條數，做開歌手最貴100萬，如果7,500萬歌酬，中、平價飛唔知點去，貴飛都要賣到5,000幾一張。」