昨日祖兒、方大同、薛凱琪等出席新城活動，為年尾舉行的頒獎禮進行拉票，由於每年頒獎禮前夕會出現好多是非，最新鮮熱辣就數盛傳是Eason和Kay的網上相片，連徐濠縈都發火鬧爆涉爭獎惹禍，身為Eason好友的祖兒對此說：「冇乜留意，我唔想回應太多唔關自己嘅事。」

問Eason有冇和她傾過？祖兒說：「冇乜嘢，佢闊佬懶理，我覺得世上多啲愛和平嘅人，好似德蘭修女，大家和平相處就好。（Eason被傳聞搞得好慘？）佢有乜風浪未見過，大家咁錫佢，搞佢唔到嘅！（唱片公司爭獎仲緊張過歌手？）歌手好被動，我冇時間理太複雜嘅嘢，大人嘢我哋小朋友唔會理。」

Kay有實力

對於Kay遭負面新聞纏身，祖兒說：「其實如果我係佢，我更加要靠自己嘅努力話畀人知，呢啲嘢完全傷害唔到我，雖然呢啲新聞好難避免，但呢個係紅嘅代價，捱到呢關就雨過天青，大家共勉之，我好欣賞咁有實力嘅人，冇事嘅！」此外，Eason完成兩場南京演唱會，雖然天氣寒冷，但觀眾反應熱烈，令到Eason high爆全場，果然有如祖兒所說，對緋聞闊佬懶理。

文：音樂組