出爐金馬獎「最佳女配角」惠英紅，昨日傍晚時分返抵香港，之後便帶着其金馬獎座直奔《宮心計》結局宴會場，望楊怡、佘詩曼能步張家輝後塵一沾旺氣，她說：「金馬獎現場我喺後台見到家輝，佢個樣好緊張，我同佢講『小紅已攞獎，細佬你淡定啲』，仲畀個獎佢攬吓，戴立忍都有摸過呀！」同樣愛錫鄧萃雯的小紅慨嘆希望今年亦有雙視后，不過她謙稱自己不是演得太好：「論感情分覺心姐好，但實際就Mary姐好。」
小紅昨日在機場雖沒化妝，但甫見記者即笑逐顏開：「冇諗過有記者等，尋晚慶功慶到凌晨五時，十點又起身，頭先喺飛機用十分鐘化妝咋，（興奮嗎？）領獎後我錫個獎，畀啲台灣記者笑我錫喺個獎嘅屁股度。」此外，小紅在前晚的慶功宴上，獲關錦鵬肉緊啜面恭賀。
