香港樂壇每年都有唔少新人湧現，但係要喺樂壇佔一位置，真係一啲都唔容易！好似有啲連名都噏唔出嘅新人，玩咗一陣就無影無蹤。加上唱片市道不景，有好多歌手為保生計都紛紛轉型，就好似趙梓淇（前名：趙頌茹)、張詠恩、陳逸璇等，都退出樂壇投身OL或保險界或模界。

問家人借錢

入行六年嘅Yan自從舊年畀唱片公司「叮」走後，一直都冇乜嘢撈，搞到要向家人借錢過活，後來仲要賣埋佢架「512」車牌嘅本田Jazz添！一直對娛樂圈死心不息嘅Yan，為咗Keep住知名度，自己做埋經理人親自接job，最近有機會同歐陽靖為收費電視台主持飲食節目，總算可以自己搵到兩餐飯食。

日前約下午五點幾，八太就喺西灣河一間專門培訓寵物美容師嘅寵物美容店內，見到有啲學員喺度接受緊為狗狗扮靚嘅課程，睇睇吓八太仲見到「冬菇頭」嘅Yan。當時佢着住條圍裙、揸住鉸剪，細心聽從導師嘅講解，好專心咁耷低頭為佢隻史納莎愛犬修剪狗毛。唔知係Yan有警覺性定係有人通水，見佢剪剪吓不時擰轉頭望出門口，雖然發現記者影相，但佢一於少理，繼續幫愛犬扮靚。

吳日言之前一直埋頭苦幹在剪狗毛。	Yan（右）與男友人分道揚鑣後，自行到附近搭小巴返歸，認真慳家。	吳日言係愛犬之人，必定好用心上狗狗扮靚課程。（資料圖片）

慳家搭小巴

上咗三粒鐘堂，Yan同一位男友人步出，冇幾耐就分道揚鑣，慳家嘅Yan到附近搭幾蚊雞小巴返歸。