前晚祖兒與許冠傑獲邀出席「香港賽馬會125週年賽馬日」活動，期間下起毛毛細雨。身穿Marc Jacobs白色連身裙、腳踏五吋斗零踭高跟鞋的祖兒，站在高爾夫球車上，不時興奮地向觀眾揮手。雖然音樂曾停頓，但未有影響其演出，盡顯天后風範！

為襯靚裙挑戰極限

早前驗出雙膝有退化迹象的祖兒，愛靚唔愛命，挑戰極限以五吋斗零踭襯靚裙，更直言：「唔驚，都係着一陣啫，因為條裙係美國買返嚟，先着高啲襯番。」

雖然祖兒無懼腰膝傷患，卻自言被天雨考起。她說：「頭先落雨，高爾夫球車上面有雨水好跣，搞到我都唔知捉住扶手好定揮手好，好彩最後冇問題。（點解音樂停咗？）我都唔知點解，可能因為我哋嗰part冇直播啩。」

許冠傑孖兒子合唱

大會即席抽出紀念馬票幸運兒，但祖兒自嘲冇抽獎運，記者即笑她錯過抽中一千二百五十萬足金的機會，她說：「可能我係勞碌命，一定要做嘢先得。不過呢個馬票都幾好，可以令中獎嘅人夢想成真！（有冇買六合彩？）有時都同啲同事夾，不過冇次中，整整下都冇人搵我夾。」

同場的歌神許冠傑以桃紅色豹紋騎師造型現身，首次踏足馬場表演的他，在馬車上笑謂：「我應該係史上最高嘅騎師啦！」其後他與兒子許懷欣及許懷谷合唱《半斤八両》，氣氛熱烈。

文：音樂組