賈思樂前晚在文化中心舉行尾場音樂會，舊拍檔露雲娜突以神秘嘉賓上台，令賈思樂呆在當場，兩人相隔廿五年再度同台合唱《Endless Love》時相繼激動灑淚，賈思樂謂：「真係好surprise，好多人話我哋係金童玉女，但我哋真係冇拍拖！」期間露雲娜多次向賈思樂說I Love You，二人又三次嘴對嘴kiss，賈思樂完騷後興奮表示：「如果十分滿分，我畀今晚十一分，嗰一分係露雲娜畀我嘅！」
賈思樂亦請來好友杜麗莎、蘇珊及後輩小肥擔任嘉賓，而盧海鵬則以「蝦仔爹哋」身份出場搞gag，他甫出場即嘲賈思樂：「成五十幾歲人先開演唱會……你有冇咁多頭髮㗎？我入去睇吓仲有咩假髮！」賈思樂聞言笑謂：「我有時真係想鍊死佢！」而前晚捧場藝人有鄭裕玲、陳玉蓮、馮寶寶、毛舜筠及楊寶玲等。
