唱片市道陷低迷，音樂人DJ Tommy為了掙扎求存，將推出USB Album的Q版figure攻潮人市場，並找來了范曉萱、MC Hot Dog、MC仁、日華等演繹歌曲，香港限量發售500隻。
DJ Tommy覺得現在愈來愈少人買唱片，惟有另闢途徑謀出路，他說：「十幾年前figure已經好好銷量，好多潮人排隊買，寧願畀幾百蚊買figure都唔買碟，我睇中咗呢個市場，決定唔用CD宣傳音樂，出figure USB代替CD，依家包銷同預售已經賺咗一半，仲好賺過CD，希望幫音樂行業創出新空間。」
DJ Tommy認為CD會漸被淘汰，惟有諗方式吸引歌迷，今次找來多位歌手助陣，其中小萱是首次合作，他說：「小萱自從以樂隊形式出碟後，已經轉型，今次呢首歌《開機關機》電子音樂好重，再另類啲，對佢嚟講係新嘗試。」