汪明荃（阿姐）與鄭裕玲（嘟嘟）齊齊發火非同小可！上周兩人錄影無綫新節目《至八女人心》時，認為監製林嘉穎無理要求NG再錄過，雙方各持己見鬧得甚僵，最後由另一主持曾華倩打圓場平息風波。
據悉當晚節目主題是有關「男女地位重新定位」，嘉賓有楊千嬅、陳敏兒與張繼聰，監製林嘉穎（Fred）希望主持人問及有關千嬅與敏兒事業比另一半好的問題，但阿姐與嘟嘟認為偏離了節目風格不肯重錄而爆發衝突。
全廠人都聽到
就此事致電阿姐求證，她說：「首先在場唔係淨係得我一個主持覺得有問題，嘟嘟都覺得好嬲，之前我哋有共識呢個節目唔係要揭人私隱，我唔明點解仲要問埋啲咁嘅問題！其實啲嘉賓都好合作，但Fred竟然開咪嗌話之前錄嗰啲全部唔要，咁樣好離譜，會令啲嘉賓好難堪！但事後Fred話冇咁講過，只係想我哋補番一、兩條問題，但全廠人都聽到！」
阿姐強調並非針對節目監製，故此最後亦與嘟嘟接受再錄一次，但結果嘉賓所講的跟之前差不多。
監製另有說法
至於林嘉穎則有另一版本：「因為新節目啲主持默契唔夠，同一時間問問題，jam埋一齊有啲混亂先至NG。但阿姐認為呢啲係氣氛，大家都有自己睇法，冇錯定對，阿姐睇住我大㗎，唔會因為咁而影響再合作。」
另一當事人嘟嘟則表示「無乜嘢回應」，而華倩就笑言：「唔覺喎，氣氛都好融洽，總之合作愉快。」至於千嬅自言當日掛住同老公丁子高傾電話約食飯，所以未有為意。
文：影視組