參選亞姐後袁小曼簽約亞視，工作量大增，因為要早出晚歸，兩個月前便搬出去自住，小曼媽更每月豪助愛女租金萬多元，身在福中的她說：「我月薪唔多，自己搵自己使，冇畀屋企，媽咪好好，幫我租屋，等我有私人空間，將來搵多啲錢，就會送份大禮報答媽咪。」
擁有八百多呎的私人天地中，最舒適是有足夠空間招呼朋友開大食會，偶爾小曼更會下廚煮幾味「撚手小菜」，最耍家是煮紅燒元蹄及南乳豬手，又不時煲愛心靚湯，所以一班好友是她家的食客：「招呼朋友時，我好有心機搞足一日整好嘢出嚟食，但自己食就好求其，煮個即食麵、煎隻雞蛋就算！」
由將軍澳搬去北角，最方便小曼去Shopping：「我鍾意去銅鑼灣買嘢，每次由將軍澳去街好似好遠，又要過隧道花好多時間，依家搬咗過海就腳好多囉，十分鐘返到屋企，搭的士都平啲。」
