Stephy跟Theresa自從組合Cookies解散後一直各自發展，但近年不斷有報道傳出兩人因為搏上位爭一姐地位而反目成仇，直至Theresa於本月初拂袖離開金牌大風，泊得好碼頭星皓，開始新里程，Stephy亦名正言順坐正「金牌一姐」的寶座。上周Stephy先於生日派對上風騷地抱抱緋聞男友方力申，令兩人關係浮面，本報日前更拍到Stephy帶埋助手睇名車，似乎她的身價地位都齊齊「升呢」。

孖助手行車展

Stephy日前出席完公開活動後，換上便服熱褲便與助手低調逛車展，早已擁有一部四十多萬元寶馬名車的Stephy，今次專攻豪華七人車，先後試坐三架不同顏色及型號的保母車，其中Stephy對一架價值六十多萬的黑色新款頂級保母車甚感興趣，不時向在場的經紀查詢性能，試坐完又鬼馬地伸手開天窗，連助手都忍不住笑她。見Stephy不時點頭又笑笑口，相信不久就會再做車主，據知，她近日已積極叫公司為她物色私人司機，一顯小天后風範。

坐在車廂內，細心觀看。

鄧麗欣與助手低調逛車展。

悠閒逛家品店

後來，Stephy到附近家品店入貨，親自挑選毛巾、窗簾等濕碎日用品，雖然不少顧客都認出她，但Stephy仍一於懶理，跟助手拎起旁邊的萬聖節面具狂玩，更互相拍照留念，十足大細路。最後她買了巫婆帽及鬼馬眼鏡離開，記者上前問她是否開萬聖節派對？她說：「唔係，睇吓啫！」

鄧麗欣貪得意試戴萬聖節飾物。	一身熱褲打扮的鄧麗欣，悠閒地睇家庭用品。	鄧麗欣細心地研究產品包裝。

採訪：音樂組