陳倩揚卸任後主力主持《東張西望》，令她有很大成功感：「除此之外，都做過一啲大型節目，可以跟其他經驗豐富司儀學嘢好開心。」對於季軍馬賽有機會拍劇，她並不羨慕：「每個人潛質唔同，我相信公司會安排。」

瞓瞓吓唔郁得

一向對答得體的倩揚，原來都有「死穴」，最驚妖魔鬼怪：「每年萬聖節，朋友最鍾意去主題公園玩，但我就好驚，可能因為我想像力太豐富，會將啲鬼怪形體化，好易就會毛管戙。」不過，當倩揚遇到「古怪」經歷，又會變得好理智，懂得自我安慰，她笑說：「以前做空姐成日周圍飛，每次都係自己住一間房，試過一次瞓瞓吓唔郁得，就同自己講可能太攰啫。」

生日媽咪有禮

日前是倩揚的生日，她會跟家人一起慶祝：「咁啱今年係父母結婚30周年，佢哋結婚日子同我生日好接近，加上我覺得呢日媽咪好辛苦咁生我，所以會特別送份禮物畀佢。（屋企人送乜禮物畀你？）佢哋好有心思，籌備咗一份好有意義嘅禮物，呢樣係我哋嘅秘密。」

文：專案組 攝影：馬永堅 髮型：Joseph @ Hair FW 服裝：Lurlicious