葉文輝（啤梨）做DJ咁多年，收收埋埋唔少爛Gag，氹聽眾開心之餘，仲可以同佢班「啤梨義工團」朋友仔玩吓，大家嘻嘻哈哈又一日。今次由啤梨出題，考考幾位藝人。問題：「卡通片《多啦A夢》中，邊個角色長大後會做醫生？」
問題：「卡通片《多啦A夢》中，邊個角色長大後會做醫生？」
官恩娜：搵埋助手幫忙都諗唔到答案，當提示是《多啦A夢》的新名字，Ella即時投降：「嘩，唔識喎，依家《多啦A夢》角色改晒名，（答案係小夫！）小夫？邊個嚟？係咪追靜香個靚仔同學？吓？乜係阿福呀？我都唔知佢改咗名添。」
狄易達 ：不消五秒就諗到答案，小夫囉，因為小夫長大之後就變大夫，即係醫生囉！（點解你會識小夫？）我睇《多啦A夢》呀，已經唔係《叮噹》嗰個年代，所以好快就諗到答案喇！
周柏豪：諗爆頭都想唔出答案，最終開古都唔明點解：「小夫？點解呀？（小夫長大咪變大夫囉！）哦，大夫，哈哈，真係好爛呀，諗到我頭都痕埋，激死！」
答案：小夫（即係阿福）