將推出全新廣東大碟《Queen of Hardships》的劉美君，日前於一間有古董擺設的大屋，為新歌《Baby You're The One》拍MV，並找來與男友一樣有日本血統的男模特兒拍攝，兩人演出投入，男模更從後攬實她，場面溫馨。該MV是一個鏡頭直落拍攝，期間Prudence還要邊喊邊拍，頗考演技，但貴為金馬影后的她，話喊就喊，絕對難不倒她。

大爆煙韌趣事

問到灌錄此歌時，是否分外甜蜜？她說：「反而有好大包袱同無形壓力，每次錄完都嫌自己唱得未夠好，結果我進出錄音室四次先搞掂，依家聽番，覺得可以再唱好啲。」Prudence大讚男友非常細心，又自爆煙韌趣事，她甜笑說：「我哋之前約埋睇《求婚的惡魔》，但睇完我發現佢冇乜點笑，事後佢話畀我聽，原來佢搭飛機返港時已經睇咗，但為咗『Keep his words』（守承諾），回來後再陪我睇，佢真係好好，原來呢個世界仲有咁嘅人，我覺得佢愈好，就愈驚會失去。」

唔怕兩地相思

Prudence與Steven雖然經常分隔兩地，飽受相思之苦，但正所謂「小別勝新婚」，她充滿信心說：「其實拍拖同距離無關，如果兩個人唔愛對方，咁點都冇用，談戀愛唔在乎國籍、年齡同距離，有時唔見仲好，可以掛住對方。」另外，Prudence於本月31日於九龍灣國際展貿中心舉行《蝙蝠之夜》音樂會，並與後輩Mr.和麥家瑜同台演出。

文：專案組