自被揭與天王郭富城同車而傳緋聞的Mango，前晚現身活動時坦言從記者口中得知有關城城與緋聞女友熊黛林（Lynn）同遊泰國慶生報道，未知是否「升呢」失敗，前晚她遲到半小時外，在活動上亦心神恍惚，至於提到早前被傳因愛自殘，Mango則做出「捅人」動作，笑言：「係都唔殺自己！」
記 = 記者 杧 = 王秀琳（Mango）
記：點解遲到？
杧：我喺機鐵站嗰邊整頭髮截唔到車，上咗車又畀的士司機叫番落車，可能繁忙時間，今日又冇保母車。
記：城城同Lynn去泰國慶生喎？
杧：冇留意，但有記者朋友打嚟問過我，都唔關我事。
記：戥城城開心？
杧：（停頓片刻）咁……咁朋友開心，都開心。
記：戥Lynn開心？
杧：冇乜戥唔戥邊個開心，（若有所思）作為朋友都開心。
記：依家似Lynn贏咗你？
杧：唔係比賽，同Aaron（城城）係朋友。
記：快啲搵個男友以正視聽？
杧：（傻笑）咁都要搵到啱自己嘅！其實依家真係想做好工作，一陣出席完活動都會去錄音，我有努力工作，唔想淨係得緋聞。
扁嘴認朋友關係
記：城城今個月生日喎？
杧：（帶點興奮）我都係呀，我都生日，吖！唔係！我11月15日。
記：同城城慶祝生日？
杧：到時祝佢生日快樂啦。
記：會唔會飛去泰國同佢慶祝？
杧：（皺眉半刻）唔會喇。
記：會唔會送禮物？
杧：（回魂大笑）睇下點，正常都會送，我對朋友好好嘅。
記：知唔知城城生日㗎？
杧：（愕然收起笑容，點頭）知佢生日，因為我哋同一個星座，會記住，係天蠍座。
記：有冇研究星座？夾唔夾？
杧：冇特別研究，淨係知大家同星座。
記：咁你覺得夾唔夾？
杧：（扁嘴，呆住半刻）friend囉。
護父母：有嘢問我
記：城城有冇投訴成日將你哋三個拉埋講？
杧：我從來都冇咁做，所以都冇聽過啲乜。有啲嘢控制唔到，我都唔想再講，但基本上冇用，不過希望唔好影響到屋企人。有咩問可以問我，我會配合番，我父母真係咩都唔識答。
記：Lynn被傳自殘？
杧：傳媒寫啫，都有寫我呀。佢（Lynn）係同行我都會幫佢講說話，唔係真。（面帶笑容）好似話我自殺，我好健康吖！（鬆一鬆肩）我唔會做傻事。
記：失戀都唔會？
杧：唔會，（做出捅人動作）係都唔會殺自己。
記：咁殺邊個？嗰個男仔？
杧：吓？唔係，講笑啫。
文：音樂組