無綫監製黃偉聲（聲哥）入行多年，參與過七十多套電視劇製作，經他像變魔術般塑造的人物「阿旺」、「李笑好」及「Laughing哥」一度熱爆，芸芸角色之中，他最愛郭晉安飾演的「阿旺」，因想不到安仔如此有喜劇天分，他又為被指難服侍的宣萱作平反。
聲哥塑造的「阿旺」角色，不但令安仔成功轉型為喜劇演員，亦令安仔在無綫奠定一哥地位，對於「阿旺」成績斐然，聲哥表示實是意料之外。
阿旺成功富驚喜
「阿旺嘅成功，感覺好驚喜，安仔係個好專業演員，當時拍《戇夫》佢話想效果搞笑啲，所以自己去增磅，之後拍《阿旺》雖然佢有屋企人離世，不過佢唔想影響其他人拍攝情緒，所以佢話淨係要一兩日假期出席葬禮就夠，雖然呢兩套劇都拍得好趕，不過就好順利，安仔同宣萱好有默契、一拍即合。」聲哥說。
提到外間指宣萱是個難於服侍的演員一事，聲哥則代她平反：「其實唔係，我好鍾意同宣萱合作，佢好專業，個人好有原則、好直，我同佢合作好多次好開心，不過有時佢睇唔過眼嘅嘢會出聲，佢係一個正義嘅朋友！」
睇好馬國明楊怡
現今後起的花旦、小生之中，聲哥覺得哪位較具潛質？他說：「《學警》系列一直同吳卓羲、陳鍵鋒合作，見到佢哋一直成長，有潛質獨當一面。特別係馬國明，睇住佢成長同不斷進步，佢由閒角一路進步成為獨當一面嘅主角，佢真係個好鍾意演戲嘅人，至於花旦方面，我覺得楊怡最有潛質，佢由訓練班出身，依家亦見到佢嘅演技愈嚟愈成熟。」
入行威水史
入行初期聲哥擔任度廠員（度廠期），其後報讀製作人員訓練班，參與製作80年代處境喜劇《香港82》，後晉升為導演負責拍攝《香港85》，2000年再升為監製，首部監製劇集為《娛樂反斗星》。
監製期間所拍攝的劇集《戇夫成龍》、《阿旺新傳》、《學警雄心》、《學警出更》及《學警狙擊》均掀起熱潮，成為一時佳話，更捧紅了郭晉安、湯盈盈、謝天華等人。
文：影視組