去年在樂壇頒獎禮上橫掃新人獎的G.E.M.，從小到大受父母培養音樂天分。她笑言最愛洗澡時作歌，特別有靈感。即將推出新碟《18...》的G.E.M.，十首新歌中，八首都有份參與。

欣賞陳奕迅狂熱

談到近年外界批評不少歌手走音，G.E.M.說：「我會做好本分，每日都會練歌同埋跑步練氣，其實我覺得冇一個歌手想在台上表現唔好，走音就更加唔想啦！但係如果真係唔小心走音，下次要有改善，如果成日走音，fans會失望㗎！我自己習慣每次表演都叫助手拍片，之後睇番有個檢討，慶幸自己都冇乜失準。」

G.E.M.最喜歡的歌手是陳奕迅（Eason），欣賞他對音樂永遠狂熱。她說：「佢之前喺台灣個騷唱足四十七首歌，真係好勁！我諗如果要我唱廿七首，未唱完已經喺個台度死咗喇，所以佢真係好叻！」十一月舉行音樂會的她，揚言會向Eason偷師。問Eason可有對她教誨？她說：「都有㗎，平時佢成日叫我做新人要乜都學，同埋一定要聽公司話，公司唔會老點你。」

大個女戒金魚嘴

今年踏入十八歲的G.E.M.揚言大個女，會戒掉招牌「金魚嘴」。

她說：「金魚嘴呢樣嘢我已經戒咗好耐，一嚟整得多包包面，我真係唔想一世包包面，第二我已經十八歲，唔可以再咁卡通，所以依家傳授咗畀阿妹，我依家係成年人吖嘛！」

文：專案組

攝：秦健輝

場地：morn creations