郭富城新歡舊愛熊黛林和王秀琳傳出自殘身體，城城的前緋聞女友Amanda S.開腔暗寸對方未定性，指城城達適婚年齡仍未願穩定下來，更叫熊黛林找過個「更高更好」的男人，寸爆城城！
昨日Aigle舉行秋冬時裝show，名模樂基兒（Gaile）、Amanda S.、Cara G.和Jocelyn擔任模特兒。Amanda剛到巴黎出席時裝周，她透露在當地與好友中田英壽吃飯敍舊，但就表示男友唔會呷醋。
要愛惜自己
對於熊黛林（Lynn）被指因情傷而自殘，Amanda聽罷即予以同情說：「佢應該正面啲，佢咁靚女同叻女，一定可以搵到個好好同好高嘅男朋友，最緊要愛惜自己。」問她可會覺得城城花心？她即指對方一把年紀仍未定性，又暗指Lynn正印身份未獲肯定，說：「或者佢（城城）覺得依家呢個唔係Mrs. Right。」
而同是天王嫂的Gaile被問及Lynn自殘一事即封嘴。她透露下月會舉行時裝騷，展示自己設計的系列，故正積極減肥。問她可會親自演繹？她即笑說：「唔會，我要好型咁做設計師行出嚟！」她又賣口乖表示想找老公黎明的愛將Janice Man行騷，大讚對方好sweet，但就未有考慮請Lynn當模特兒。
腸胃炎入院
另外，Lynn的經理人Kim昨日指Lynn現於上海拍戲，自殘入院的消息屬流料。Kim說：「Lynn只係有腸胃炎，佢唔會做傷害自己嘅事！」至於城城將於明天（8日）赴曼谷，為由彭順執導的新戲《B+偵探》試造型，並會於10日開工。 文：名人組