愛情篇
今年暑假回港的超盈外表比去年豐腴漂亮，她戒酒戒蒲，還為守候醫院門外的傳媒體貼地送上手提風扇，她把一切的改變歸功於男友Greg。
玩狗仔種情苗
超盈與Greg拍拖半年，二人在英國的朋友家中食飯時結識，超盈對Greg的第一個印象是：「好斯文、好靜，跟自己不同。」Greg初時也抗拒跟她做朋友，超盈解釋：「佢係一個好Simple嘅人，我之前有啲負面報道，佢有睇過，因為英國嘅圈子好細，佢以為我係嗰種千金小姐，鍾意玩，但後來熟咗發現原來唔係。」看似沒有交接點的二人後來因為愛狗而打開話匣子：「朋友屋企有養狗，我同佢都好鍾意狗，大家一齊玩狗，就係咁開始傾偈。」
18歲已玩到夠
超盈欣賞Greg有上進心、細心，對她及其家人好，但最能打動超盈的是Greg對她的一片真心，曾經歷過不愉快的拍拖經驗的超盈嘆謂：「因為我哋身份嘅問題，好難搵到一個鍾意我多過鍾意我屋企嘅錢或者名譽嘅人，好難有個真心嘅男朋友。」超盈認為Greg影響她最大的是性格，她形容以前的自己幼稚，凡事只會考慮自己，現在雖然未算成熟，但會顧及他人感受，她說：「佢真係攞個心嚟對我，會關心我，有時我出街去到好夜，我會好內疚，佢係我男友都咁關心我，何況我屋企人？」
拍拖後變成熟的超盈承認以往一度很反叛，當時只為激吓媽咪，她認真地說：「依家我已經玩夠，我知18歲話玩厭好怪，但我已經開始攰，我唔係話我唔會出去玩，但我會同男友出去，亦唔會好似以前咁玩天光先返屋企，可能飲杯嘢就走。」
親情篇
對超盈來說並非戀愛大過天，她永遠把家人放在第一位。
今年8月賭王因撞傷頭部入院，與家人感情深厚的超盈，其擔心程度可想而知。得悉父親入院時，超盈正身在澳門，她即時飛奔返港，當她抵達醫院，賭王正進行手術途中，她只有等待乾着急，在醫院度過一生人中最漫長的一天。
父做手術好驚
她形容：「當時好驚，好唔開心，忍唔住喊，以前從來冇發生過呢種事，係我咁大個女最驚最緊張嘅一次，直到爹哋做完手術出嚟，個人先鬆一口氣。」原定暑假後返回英國升讀大學的超盈，因父親入院，毅然決定留港讀書，以實際行動支持雙親，令人動容，超盈說：「係媽咪提議我留低，其實佢一開口，我已經OK，冇乜點考慮，我男友都好支持我呢個決定。今次留低主要係支持媽咪，而且爹哋康復後，佢好需要屋企人陪以及做物理治療。」一直在英國讀書的超盈，今次犧牲可謂不少，要重新適應香港的讀書環境、同學以及狗仔隊，豁達的她自認適應力強，有信心可以面對一切。
入廚炮製幾味
賭王入院後，四房紛爭的報道時有傳出，外人必然以為會像電視連續劇的橋段般複雜，但事實往往出人意表。超盈強調四房相處和睦，她說：「我哋好開心，無論邊房嘅家姐同媽咪都好融洽，冇你哋講嗰種鬥呀同比較，可能冇人會信，但我哋真係好正常嘅家庭生活。」至於賭王與一般父親無異，一家人經常食飯，還會鬥嘴，超盈笑謂：「我哋每星期都會食幾次飯，全家會一齊睇網球比賽，因為大家都鍾意，但又捧唔同球星，所以成日鬥嘴，好好笑。」
早前超盈愛上烹飪，她還親自下廚炮製了幾道家常菜，非常溫馨：「我煮咗蒸魚、炒菜同埋爹哋最鍾意嘅蛋白蝦仁炒粉絲，聽落好易，但對我嚟講幾難，係我第一次煮。細佬好衰，整蠱我，叫爹哋唔好食，因住肚痛，但爹哋梗係話好食。」超盈娓娓道出家庭趣事，尋常如平常百姓家。
父母從來唔鬧
賭王曾自稱家中是慈父嚴母，不過，實情是父慈母不嚴，超盈笑指無論父或母都從未真正鬧過她：「我好尊重佢哋，唔使爹哋開聲鬧，只要佢皺皺眉，我就會改，爹哋咁多年都冇鬧過我，媽咪都冇，佢只會用搞笑嘅形式同我講，佢可以話係我另一個Best Friend。」就算家規也只有簡單兩條，就是不可隨便帶陌生男子回家，以及要返足學。
在各房兄弟姊妹中，超盈與三房的超雲最為老友，大家經常相約食飯Shopping，她說：「我同超雲年紀差不多，大家都鍾意行街買嘢。超蓮同我細佬夾啲，佢經常會同我講邊個台灣明星啲歌好聽，Send段鈴聲畀我。」雖然外界愛把超盈與超雲作比較，但她完全不介意，縱使連賭王也公開比較女兒的樣貌，曾被批評「麻麻地」的超盈沒有放在心上，她大方地說：「我真係冇佢哋咁靚，我啲家姐都好靚，比落去我唔夠好，可能我之前比較肥。」
文：陳嘉敏