崔建邦前晚為「超級巨星耀中秋」擔任司儀，同場嘉賓還有官恩娜、鄧紫棋及陳柏宇等。對於日前有讀者梁生向本報爆料，指崔建邦哥哥過去四年內拖欠其公司七十多萬元，又謂多次向對方追討不果等；前晚崔建邦甫見記者，即謂收到一聲稱替梁生討債的男子電話：「唔知點解佢會有我電話，我估計打嚟嘅係收數公司，佢一日打幾次嚟真係好滋擾！（有冇講啲咩？）好似『出街小心啲』嗰啲，總之好滋擾性，所以我已經決定報警，公司知道呢件事，陳生（即陳志雲）都好贊成。」

冇做哥哥擔保人

崔建邦指其兄的店舖因經營不善而負債纍纍：「我同媽咪都幫佢還咗好多次，件事發生後都有同哥哥了解過，佢同我講只係欠對方三十萬。（有冇做擔保人？）冇冇冇。（無辜被拖落水？）唔可以咁講，始終係一家人。」崔建邦指幸好媽媽未接到此等滋擾電話，但為安全起見，他今天將與律師一同到警署備案。

官恩娜忽略男友

而近日人氣急升的官恩娜，甫出場即歡呼聲不絕，在台上她除答謝大眾支持外，更笑言最感謝的是節目《超級巨聲》，說畢她更吻背後的布景板。官恩娜坦言因工作忙的關係，故跟男友已有好一陣子沒有見面：「呢排真係少咗見，工作太忙忽略咗佢，不過佢都好體諒，平日大家會以視像見面。（騷後約男友？）唔會啦，要招呼日華帶佢去食好嘢啦！」日華表示十二月將於東京舉行發布會，屆時他指會邀請官恩娜任嘉賓。

鄧紫棋做完騷即趕回家與家人過節。	官恩娜同日華台上合唱，大受歡迎。	官恩娜開心到親吻布景板。

文：音樂組