Jade將於本月底和金融才俊楊長智，於峇里島舉行300萬婚禮，曾打算淡出樂壇，疊埋心水做闊太的她，有傳不敵「星娛樂」重金利誘及誠意打動，首肯加盟「升呢」做「當家」，騎住先入門的鍾嘉欣、鄭融成為大家姐，預計婚後正式動筆簽約，明年中才推出新碟。

報知遇之恩

據消息透露，「星娛樂」有感女歌手如陳慧琳、楊千嬅及謝安琪結婚生仔後，人氣不跌反升，故覺得簽即將嫁人的Jade亦「有着數」，故隨即向Jade埋手，可是她曾以「我嫁人，唔再唱」為理由婉拒，不過Jade又考慮到接洽她的唱片公司行政總裁何哲圖，正是她初入行時的經理人，對方有知遇之恩，故最終也改變初衷，不過她要求唱片公司等她完婚後才再詳談，而唱片公司更「優待」Jade，在兩年合約期內，沒有「不准懷孕」的條款。

搞好婚禮先

Jade接受電話訪問時承認有傾過「星娛樂」，不過未落實，她說：「仲有另一間唱片公司傾我，但目前我最緊要係搞好婚禮先，工作遲啲先算。」至於何哲圖就表示：「對任何有潛質歌手，公司都有興趣。」

文：音樂組