Theresa昨晚與楊愛瑾（Miki）出席關注乳癌活動時，向傳媒公布已發律師信給金牌大風，要求解約，她說：「係我主動要求，之前有同陳輝虹講過解約，今日係正式發律師信，我好多謝佢之前講過無條件同我解約。」提起解約心情，Theresa坦言有一段時間很不開心。至於是否因黃栢高（Paco）被調離唱片部才有此決定，她說：「Paco都有好好嘅發展，我仲有一套同金牌拍嘅戲，我會好好宣傳，我有同Paco聯絡過。（係咪意興闌珊？）大家都有共識。」

新公司斟洽中

盛傳Theresa不願歸順太子黨及與鄧麗欣不和，為免被雪藏才提出解約，被問到是否與鄭中基不和，她沒有正面回應：「依家成件事交畀律師處理，唔可以交代咁多。我同佢合作過拍電影，大家合作愉快。」被問到兩人是否朋友？她即語帶諷刺說：「我好少去慶祝會，放工就返屋企。（埋唔到堆？）每個人性格唔同。」

至於有否向鄧麗欣、方力申講解約一事，她即收口不願多談，只表示會承擔一切：「一個人去承擔好大壓力，不過都係一個磨練。」對於Cookies四分五裂，她說：「呢個圈大家都會再見面，呢個世界係圓，（會否覺前路茫茫？）我好緊張我嘅事業，不過做呢個決定冇諗其他嘢，依家都有幾間公司傾緊，不過未落實。」

另外，有傳吳雨霏亦有意離巢，Theresa說：「我冇查證過，如果佢開心我會支持。」

「根本唔成立」

金牌大風CEO陳輝虹昨日表示已收到Theresa的律師信，更不屑地說：「仲要係fax版本，我嘅感覺係『點解又要咁？』，我哋已願意解約，冇任何阻礙，唔明點解佢要發律師信，除咗做新聞搞作同佔據篇幅，都諗唔到第二個理由，我覺得呢封律師信根本唔成立，份合約係佢親手簽，好詫異。發律師信都要成本，多此一舉。」陳輝虹又謂未清楚解約日期，要再問共同擁有Theresa經理人合約的Talent Bang先知，他已將事件交由律師處理，又表示解約不需要Theresa賠錢。

而Talent Bang副總裁Tony表示不在港，未清楚Theresa有否寄律師信給他，被問到Theresa有沒有與他公司提出解約，Tony說：「未提出，成件事未清楚。（同唔同意？）未知，仲要傾。（會唔會簽埋Theresa？）遲啲開會傾。」

採訪：名人組