女星產後個個都話要極速修身，不過都有唔少失敗例子，張燊悅個女都七個月大，到依家仲係好似身懷六甲咁，早排畀人話佢肥腫難分後，擒擒青走去買過條靚裙嚟換，但八太見楊師奶fashion sense「降呢」，揀咗條鬆身橫間連身裙，更加「自暴肥短」。
圈中女星最注重身材，尤其「媽咪級」女星個個都話要減肥修身，就連潮媽Kelly產後肥咗幾磅都嗌晒救命。之不過都有唔少女星中咗「不瘦降」，好似嫁咗教育局政治助理楊哲安嘅張燊悅，雖然佢個B女Lucy已經七個月大，但係佢仲肥嘟嘟未修身，八太都以為佢又有喜，搞到楊哲安都要幫佢解畫，話老婆肥得可愛有福氣。
強調未修身
張燊悅日前現身活動時，仲鬼咁sharp着住條芥辣黃連身裙，再配埋對綠色高踭鞋，八太離遠十尺都見到佢；但行近啲睇，張燊悅肥腫難分，個肚仲脹卜卜添，佢解釋只係未修身，唔係又有咗。張燊悅次次現身都畀人誤會係大肚婆，難怪佢活動後即刻搵咗兩個朋友陪佢去shopping變身。
索價四千蚊
入到間舖，張燊悅明顯好心急，極速揀咗幾條靚裙叫朋友畀意見，揀完裙仲順手揀埋對鞋，擒擒青入去試身室，出嚟時見佢換咗條又闊又鬆身嘅橫間連身裙，再加埋對平底鞋，不過佢似乎對新形象好滿意，仲自信心爆棚喺鏡前左照右照撥晒頭髮。雖然條裙係名牌子索價四千蚊，但估唔到榮升楊師奶嘅張燊悅，竟然唔記得肥人最「棹忌」着橫間，佢唔單止揀條連身橫間裙，仲即買即着，八太見楊師奶變身後成隻復活蛋咁，佢仲彈吓彈吓去搭的士，咁可愛，唔怪得老公都讚佢肥得有福氣啦。
文：追蹤組