由梁靖琪（Toby）、陳鍵鋒、伍詠薇、夏雨、商天娥主演的無綫新劇《翻叮一族》開工數日，女主角之一的Toby因面部皮膚受細菌感染要入院留醫，由於面部傷口未愈，Toby為要多加休息，惟有辭演《翻》劇，而她的角色改由唐詩詠頂上。
前晚唐詩詠與陳鍵鋒為劇集拍攝外景，期間二人對於Toby因病辭演表示擔心，唐詩詠謂：「前日先收到通知要頂上，之前同Toby有合作過，佢去睇醫生我都有陪佢，佢話個鼻好唔舒服，起晒水泡發晒炎，痛到瞓唔着，醫生要佢留院，知佢尋日啱啱出院要休息多啲，唔可以流汗。（介意執二攤嗎？）唔介意，原先我係放假，睇咗劇本覺得角色好好，係一個好機會，Toby知我代佢，佢仲叫我畀心機演好啲。」
陳鍵鋒感可惜
至於陳鍵鋒對於今次未能與Toby合作表示可惜，他說：「未同過Toby合作，知佢因為皮膚有事開唔到工，都好可惜，不過依家都有另一個新鮮感，因為今次同唐詩詠係首次合作。（會唔會探Toby？）同佢唔熟，未知道情況，會嘗試SMS佢，希望下次再合作。」
匿埋唔敢見人
Toby就透露住院兩日已出院，表示鼻部皮膚含膿、出水，感覺痛到似畀煙蒂辣親，她說：「醫生驚啲菌上腦，所以幫我打針，食咗藥之後有啲反胃，而我依家都唔敢照鏡，好多同事都話嚟探我，不過我費事畀人見到個樣。」
文：影視組