春風滿面的劉美君（Prudence），最近跟一名美日混血兒打得火熱，不過日前她就揸住架新落地、價值45萬的Audi跑車，跟舊愛鄒世龍密會，兩人撐枱腳撐足兩小時，仲傾到貼身咬耳仔。
愛情、事業兩如意的Prudence，最近親口承認已有美籍男友，既忙於為無綫主持《超級巨聲》，下月又推出新碟，日前Prudence獨自駕駛新橙色跑車在炮台山出現，泊好車後就走入一間日本食店，之後突見Prudence的舊愛鄒世龍現身，原來兩人一早約好。
斟足兩粒鐘
兩人坐在店內靠近角落的位置，點好食物後，兩人邊吃邊密密斟，言談間傾到合作事宜，不過當談到新車時，Prudence就表現得雀躍、興奮，還說：「一陣你出去睇吓。」兩人撐枱腳撐足兩個多小時，才由鄒世龍埋單離去，臨走Prudence仲雞啄唔斷，拉住鄒世龍咬耳仔。
愛車之人鄒世龍走出食店外，即第一時間上前欣賞及研究Prudence的新車，講到車經就滔滔不絕，又指手畫腳，二人企街傾足成十分鐘，鄒世龍才揮手跟她道別，之後她獨自走到附近的車胎舖睇胎軨，但未見收穫。
潮媽多人爭
屬於「潮媽一族」的Prudence雖然年屆44歲，已生了三個小朋友，但多年來保養極佳，當日穿上緊身黑衣黑褲，身材弗到漏。
自從榮升做金馬影后之後，Prudence身價「升呢」，不但被無綫邀做主持，據知鄒世龍的經理人公司也有意跟她傾約，而環球唱片除了為她出碟，對其經理人合約也表興趣，一下子成為搶手貨。
文：音樂組