《2009亞洲小姐競選》（港澳賽區）將於本周四淘汰剩八位佳麗，進入十一月初的總決賽。十二位佳麗昨日先放鬆心情，換上沙灘裝進行水上競技，不過為顧及亞姐形象，比賽並不激烈，佳麗亦黐好膠紙做足防走光措施，但佳麗的沙灘裝尚算性感，其中(5)林紫君、(3)莫曉菲都頗有睇頭，反而上圍有34的(2)王希瑤明顯「跌Watt」，胸部縮水。

請化妝師食飯

早前病倒缺席活動的王希瑤甫見到記者即賣口乖：「仲有少少咳，但唔落水，大會畀晒毛巾，近排天氣凍，大家要保重。」問到是否被整容傳聞激病？她說：「唔驚呢啲新聞，都唔係事實，唔明點解要寫到咁，我都攞報道畀爸爸媽媽睇，媽媽都話啲相唔似我，其實有啲相唔係我。」

至於被指相貌與舊照有出入，王希瑤無從辯駁惟有賴冇記性：「做模特兒影嘅相係要配合公司，盡量做佢哋要嘅樣。至於學生大合照我都唔知裏面嗰個係咪自己，我讀過咁多學校，唔記得，我記性好差㗎，今日講嘅嘢聽日可以唔記得，（會唔會唔記得自己以前個樣？）女大十八變，蔡依林都七十二變，（佢都被傳整容喎，）佢有教過我哋上圍變大三部曲，個鼻真係好靠化妝師，真係要請佢哋食飯。」

鍾維愈幫愈忙

另外，(9)鍾維原想幫王希瑤說好話，但就愈幫愈忙：「佢冇講唔係佢，我覺得似佢，但有少少唔同，（整過容？）唔想講呢啲，女大十八變嘛，（咁你有冇唔同？）樣冇變，係感覺唔同。」

文：影視組