前晚的《星光熠熠耀保良》以「大雜燴」形式舉行，嘉賓雖有星級人馬，但卻沒甚驚喜，不過譚詠麟（阿倫）狂寸鄭裕玲（嘟嘟）搵埋呂方耍六通拳，就掀起一陣小高潮。
無綫每年的例牌慈善騷《星光熠熠耀保良》前晚舉行，嘉賓有產後首度演出大騷的陳慧琳（Kelly）、陳奕迅、楊千嬅、李克勤、張智霖及周麗淇等，司儀有嘟嘟、陳貝兒、黎耀祥，雖然陣容鼎盛，但以唱歌形式為主未有驚喜，只有黎耀祥的扮嘢solo稍具睇頭。
針鋒相對
節目尾聲阿倫與嘟嘟在台上介紹長者服務時，嘟嘟對阿倫說：「你都就嚟用到啦！」阿倫淡定還擊：「係呀，我約埋你同呂方一齊去打六通拳。」嘟嘟強調已跟呂方分手不用再約，但阿倫仍咬住唔放，謂分了手仍可約會，最終嘟嘟無奈收聲。
事後阿倫在慶功宴上笑笑說：「啲稿原本係話我哋就嚟用到長者服務，點知嘟嘟只係講我，咪拖埋佢落水囉，（唔驚佢介意？）有咩好介意？（同呂方）一場朋友，都冇話一場夫妻，大家約埋打六通拳係健康嘢吖，（成日寸到佢冇聲出？）唔係寸佢，玩吓啫。」
一家健康
產後復出的Kelly吸引不少歌迷撐場，台上嘟嘟知Kelly最愛兒子劉昇下巴似蝦餃，問她仍會否吃蝦餃？Kelly笑言：「錫到燶至食。」節目完畢後Kelly即歸家見囝囝。昨日是Kelly卅七歲生日，她表示在家吃老公買的生日蛋糕，過簡簡單單的三人世界，而生日願望是一家人包括囝囝身體健康。
文：影視組