著名瑞士時計品牌DOXA前晚舉行百二周年紀念晚會，大會以七位數酬勞委任型男方中信為亞洲品牌代言人，並由方中信展示全球限量發行的手錶系列。事後，他表示該品牌給予他名錶任揀的機會，他亦一口氣揀了數隻價值五位數的名錶，他說：「點解揀咁多？我向來都喜歡收藏，自從有咗囡囡之後，好耐都冇買名錶，今次有錶送，可以慳番啲錢，唔使買玩具畀自己，留番啲錢買玩具畀個女。」

酬勞只夠四人分

席上擔任表演嘉賓的黎諾懿、蕭正楠、陳山聰及袁偉豪，扮演溫拿樂隊唱歌，並以現代褲、緊身衫懷舊造型示人，其中陳山聰更笑指黎諾懿着上緊身褲後籮柚最挺，他說：「我哋戴咗假髮之後，感覺好似癲佬。（溫拿有五個人㗎喎？）係呀，不過今晚賺嘅錢淨係夠四個分嘛。（要唱歌？）係呀，不過黎諾懿係咪嘴王，唱歌嘅時候淨係得我同蕭正楠唱咋。」

未聞關淑怡嫁人

而同場張學潤亦有到場，對於關淑怡被指廿多年前已婚一事，他表示：「八五年我都未識關淑怡，同佢做咁耐朋友都未聽過咁嘅嘢。（你曾為佢設計形象？）嗰時都冇咩蛛絲馬迹，我都有問湯寶如有冇試過結婚，佢話梗係冇啦。（個仔係咪結咗婚呢個男人？）唔知。（個仔似曾志偉嗎？）一啲都唔似。」

文：影視組