近乎零宣傳的許冠傑（Sam）演唱會，銷情相當不俗，除加場外，演唱會更加料炮製，將有音樂劇部分，並邀請女星任嘉賓演繹「海報女郎」一角，工作人員曾提議搵o靚模，但即被出品人高志森反對，指「好cheap，影衰晒」，最後他建議搵蔣怡上陣，結果獲得許冠傑等一致通過！
蔣怡以一身輕便打扮現身紅館為許冠傑演唱會作綵排，因蔣怡是演唱會唯一一位女嘉賓，問她心情會否很緊張？她表示：「唔緊張，啲舞步都好簡單，第一次同許冠傑合作，我之前都係聽佢啲歌嚟學廣東話，好榮幸能夠同歌神合作，從未諗過會有呢個機會，因為同佢唔係同一年代，好多謝高生（高志森）記得我。（喺演唱會上係咪會着泳衣上陣呀？）係呀，會好性感同狂野，但係健康嘅性感。」
從海報中跳出來
因蔣怡在演唱會中擔任「海報女郎」一角，需要從海報中跳出來，所以，日前蔣怡在影樓拍攝海報，談到她的角色，曾有人提議搵o靚模，但最後高志森嫌cheap反對，改找形象性感健康的她演出，蔣怡表示：「真係㗎？真係要多謝嘞！」
非家庭成員嘉賓
高志森亦承認因覺得o靚模形象不適合任許冠傑演唱會嘉賓，他表示：「o靚模太cheap，影衰晒，蔣怡形象健康同性感，適合好多。今次演唱會，因為阿Sam想以歌會友，所以宣傳近乎零之餘，亦唔會有好多嘉賓，除咗許冠英同阿Sam兩個仔之外，蔣怡係唯一一個非家庭成員嘉賓嚟㗎。（銷情如何？）非常之好，仲加多一場，原本九月六日阿Sam生日係尾場，依家變咗七日至係尾場。（佢生日嗰晚會點慶祝？）呢個係秘密，總之嗰晚演唱會會有驚喜。」
文：影視組