劉德華雖然出名工作狂，但每年九月生日，都會刻意安排整個月不接工作，以便休息及慶祝。然而，他今年卻「讓出」九月份檔期，接拍杜琪峯賀歲新片。連同早前拍畢的《未來警察》在內，華仔原本有兩齣賀歲片「雙龍出海」會觀眾。不過，近日備受負面消息困擾的華仔，與阿杜的合作需要無限期押後。
寰亞電影發言人莊澄昨日坦承該片要押後開鏡：「因為檔期唔夾，女主角要開演唱會，內地演員啲期又唔夾。（同華仔形象有冇關係？）冇，佢結婚係佢私人事，唔會影響到電影。（網民日日狠批喎！）啲網民一向都咁激㗎啦！」杜琪峯亦透過秘書表示唔關華仔事，力撐對方。
拍檔開腔力撐
至於華仔手上的另外兩套新作，夥拍李連杰主演的《新少林寺》及已拍竣的《狄仁傑之通天帝國》，就未有受影響。《新》片導演陳木勝開腔力撐華仔說：「華仔近日嘅新聞唔會影響我哋開戲計劃，一切照原定計劃，年尾開鏡。其實華仔作為一個公眾人物，佢隱瞞私事都有佢苦衷。」《狄》片的製作人施南生則表示：「套戲依家做緊後期，未知幾時上，華仔嘅新聞冇影響，佢被人知道結咗婚都冇辦法，套戲做完後期，就會安排上映。」
另外，有傳華仔將接拍一套到希臘取景的愛情片，該片導演馬楚成說：「套戲卡士未定，交由電影公司決定。（點睇華仔近日新聞？）藝人私事，同工作冇關，華仔係好演員。」而與華仔長期合作的道地綠茶，昨日亦以書面力撐華仔，指「華仔私人事件，對合作絕無影響，華仔勤力而專業，一直合作愉快。」
父母如常外出
華仔自前晚回港後一直未有露面，但他的父母就如常外出，昨日早上七時十五分左右離開寓所。劉爸爸禮貌地舉手跟記者打招呼，但對所有提問，包括「華仔想人工受孕，為你添男孫？」、「華仔有冇同你傾心事？」、「華仔咁多新聞，你點睇？」，一律不作回應。而對於有雜誌指華仔有仔唔認，華仔助手昨日回應表示：「華仔喺機場已經一次過講晒，唔會再回應。」
文：影視組