William、鄧紫棋（G.E.M.）、詩雅、江若琳、Square、林司敏及傅穎等前晚現身電影《愛出貓》首映，首次拍電影的William，透露心情如初演音樂騷般緊張，幸得家人到場支持，令其輕鬆不少，問到有否邀請Baby出席，William笑謂：「冇呀！因為種種原因啦！佢應該有嘢做，其實我之前音樂會請佢去睇，結果出咗好多花邊新聞，呢樣係我唔想嘅，都係等遲啲買飛同佢入場睇（會唔會坐隔籬？）好難喎！通常佢同大班女仔睇，點坐呢！」談到Baby出發日本行時裝騷，William坦言不會同行，更指早前欲請假兩天陪家人，但卻不獲公司批准，故若要飛日本根本不會成事。

G.E.M.保住初吻

而首次擔正演出的G.E.M.，直言演戲演上癮，笑指即使要演醜女及暴力角色亦冇有怕，更謂：「我螢幕初吻仲喺度，細個時幻想畀哈利仔，仲想自薦演張秋角色，不過依家就一切順其自然啦！」

江若琳撐林嘉欣

江若琳對林嘉欣於韓國電影節封后大呼高興，讚對方人靚聲甜，就連身邊男友人亦表示聽了嘉欣的聲音便會融化，更謂：「我會視嘉欣為奮鬥目標，雖然佢攞獎部戲我未睇，但我會買碟捧場㗎！」談到圈中多位藝人先後被踢爆結婚，更被斥為大話精，江若琳笑言為免承受壓力，所以若他朝拍拖便會率先公布。

文：影視組