楊千嬅日前大方承認與Real在拉斯維加斯註冊結婚，而昨日這對新婚夫婦分別出席公開活動時，除了不時隔空傳情外，Real更表示會自組公司努力賺錢養妻。雖然他表示不介意被指女尊男卑，不過亦表明不會要千嬅財政上支持，更否認婚後會入住千嬅位於赤柱的豪宅，實行以行動推翻所有指他貪千嬅錢的傳聞。

香港上海兩邊走

承認結婚後首次出席公開活動的Real，昨日以一身黑色西裝打扮出席旗艦店開幕酒會，全程保持微笑，並表示與千嬅婚後好開心，透露現時二人仍然分開住，希望遲些可以與千嬅過二人世界，而問到他是否將搬入千嬅位於赤柱的富豪海灣豪宅？他即澄清：「唔會，呢個可能性好低。（依家係咪要努力搵錢養妻？）係，所以我工作上有好大轉變，諗住自組公司。（千嬅係富婆，對你有冇壓力？）年前自己已有計劃，我父母都話係時候叫我自己搞公司，可能要香港上海兩邊走。（叫千嬅財政支持你？）我爹哋支持我就夠，唔使佢支持我。」

問到Real會否介意被指男卑女尊？他說：「咁多年，我好多嘢都冇解釋，好多傳媒不斷攻擊我都冇解釋，對我好多偏見，我答咗又要問千嬅，令佢好大壓力，所以我一路唔出聲，總之對自己工作有信心。（有傳你可以分千嬅身家？）佢分我身家好啲，我唔會分佢身家。（有冇寫婚前協議書？）我會買份保險，畀晒所有嘢佢。其實呢啲報道，每兩個月寫我一次，我只係去過千嬅屋企一次，就話我搬咗入去住，話係我愛巢。」

不少報道都指Real人工奀，月入才兩萬元，Real對此頗為不滿，他說：「又話我人工兩萬蚊，問心，有冇可能兩萬蚊請到我，成日話千嬅買車畀我，架車我由細揸到大，不過係比較平。（你哋財政獨立？）應該係咁，唔會干預佢嘅工作。」

冇諗夫妻檔搵銀

而千嬅昨日就以一身貴婦造型，出席無綫《慎用救護愛心SHOW》錄影，席上千嬅更唱《真命天子》，十分應景，一臉幸福的她，被問到會否與Real夫妻檔接廣告？她謂：「冇諗過。（夫妻檔賺多啲？）唔係平貴問題，唔通拍女性廣告又搵佢咩！」而活動後二人分別到跑馬地及銅鑼灣用膳。此外，提到近期不少藝人被揭發已在拉斯維加斯註冊結婚，千嬅表示是骨牌效應，自言累了黎明，又說「源頭」並非她，暗指由劉德華引起。

文：影視組