劉德華近日被網友圍攻抨擊，令演藝事業和正氣形象大受考驗，張堅庭昨日教華仔「拆彈」，他說華仔應該上電視或找傳媒做專訪，剖白心路歷程，張堅庭說：「華仔係基於影迷熱情同對自己信心不足，所以一直未能將事件好好處理，佢應該鄭重向fans和朱麗倩道歉！同埋其他偶像唔好學華仔咁樣呀！（會唔會建議華仔開記招交代事情始末？）千祈唔好開記招，咁做太高調，畀人誇張感覺。」
至於張學潤（Nelson）則指點若然華仔舉行記招應以甚麼衣着示人：「華仔有自己着衫style，得體舒服，唔會刻意跟潮流，我覺得恤衫、fit cutting西裝褸同牛仔褲就ＯＫ。」而肥媽瑪利亞談到華仔被爆已婚時說：「結婚點解唔畀人知？好醜咩？佢可能擔心fans接受唔到自殺，其實公開咗好啲，對另一半公平啲，有名有分嘛！公開咗仲可以令其他人唔好亂咁諗嘢。」