華仔被踢爆和朱麗倩於08年6月23日已在美國秘密註冊，隱形女友原來一早坐正做華嫂，但曾承諾結婚一定公告歌迷的華仔，沒有言出必行，令誠信徹底破產；事發後，華仔即避走大陸，只在官網承認已婚，並以「遲來的坦白」向歌迷謝罪。
終親口承認已結婚
自與朱麗倩由馬來西亞返港再上大陸工作，全程封嘴七日的華仔，昨日返港即在機場上演一幕「天王謝罪」，由於有消息指華仔會於下午四時抵港，近百歌迷手持「你是最好的」、「我們永遠支持你」橫額湧到機場護駕，唱片公司集團董事陳志光親往接機，現場有八個保安加半百傳媒恭迎華仔。
愁眉深鎖的華仔，在助手陪同下現身機場抵港大堂，他見到傳媒和歌迷即雙手合十，歌迷手挽手築人牆阻記者埋身，一場大混戰後，華仔最終肯停下受訪，問是否很大壓力？華仔無奈說：「首先我係公眾人物……」霎時激動眼紅：「最近自己講大話行為，令好多人失望，所以要公開同相信我嘅人道歉，希望佢哋可以原諒我，我只可以公開講，我係結咗婚。」
細路女係家姐個孫
承認已婚的華仔，卻否認有子女：「我冇細路仔，無論男女都冇，以前到依家都冇，全部都係屋企人、親戚或朋友，佢哋仲細個，畀佢哋過平靜生活。」至於十一歲疑似女兒，曾在外父的喪禮出現，又被影到與華仔父母飲茶，華仔澄清說：「唔係同一個人，飲茶嗰個係家姐個孫女（即外甥孫）。」由於華仔在官網上暗示接受人工受孕，但昨日他卻說：「呢件事放心入面，唔想講出來。（成功會唔會講？）到時先算。（譚詠麟話過你兩招？）多謝，多謝，多謝！」
如釋重負鬆一口氣
承認已婚的華仔，終於鬆了一口氣：「一個秘密一路放心裏面咁耐，自己依家可以……點講呢？（如釋重負？）唔係，唔識講。（太太都鬆口氣？）唔好討論咁多。（太太大壓力唔敢出街？）當然會，希望佢好。（最擔心佢？）所有人都擔心，但最擔心佢。」
至於唔公開婚訊是否為保護家人？華仔說：「唔想大家有揣測，要講嘅都講晒，我自己錯係應該，其他人唔應該。（被插講大話有冇唔開心？）唔開心，喺嚟緊日子會做好啲。（帶太太出席歌迷聚會？）冇諗過，未知。」
對陳年舊愛喻可欣借勢發功，會否覺得她出風頭？華仔神情嚴肅說：「唔好再討論咁多，我衷心、衷心同相信我嘅人講對唔住！對唔住！（當年你同喻可欣簽過婚書？）係有。（怕唔怕佢攞出嚟？）冇所謂。（有冇後悔？）唔想再講。」此時助手即拉走他，記者追問：「冇兌現承諾對喻可欣唔公平？」華仔即時封嘴，至於黎明和楊千嬅亦被爆已婚，華仔合十回應即上車直返加多利山家。
記者又致電華仔唱片公司總裁余先生，問及如何拆解今次危機？他說公司會盡快同華仔傾如何面對，暫時冇諗過開記者會，華仔在機場已交代一次，重點已經講咗。」
文：音樂組