在書展因噴血寫真大賣而人氣急升的尹蓁晞（Yumi），早前被踢爆與髮型師男友到酒店過夜兼引來援交疑雲後，形象急劇插水；加上Yumi不忿同門師姐趙碩之落井下石而含淚反擊，在種種負面新聞纏擾下，Yumi的經理人公司決定將Yumi掟入雪櫃，務求讓她深切反省兼暫避風頭。

不過，據知原由Yumi擔任代言的線上遊戲《反斗西遊》，雖於動漫節時已舉行記招宣布Yumi為代言人，但因Yumi形象告急，故最後改由八模兵團的A.Lin頂上。

經理人撐多工作

對此，Yumi經理人Angus直認與遊戲公司已結束合作關係，但強調雙方一直合作愉快：「其實Yumi之前嗰篇報道（酒店過夜）出街之後，我哋同遊戲公司一直都有通電話，因為大家都明白依家係非常時期，所以達成共識，暫時停止呢次嘅合作關係。（原本簽咗幾耐？）都係一年，雖然只係合作咗好短時間，但佢哋冇叫我哋賠錢；而且我哋唔排除之後會再合作，因為Yumi都係幫呢間公司做game girl出身嘅。」

Angus更大方地指A.Lin會是新代言人的上佳人選：「搵佢做幾好呀，佢咁靚女！」Angus又澄清Yumi工作其實未受影響：「一直都有好多人搵Yumi做嘢，只係因為佢依家要反思，所以大家先覺得佢好似受影響啫。（佢有冇其他工作要抽起？）絕對無。」

遊戲網率先踢爆

線上遊戲公司Gamania的發言人則對更換代言人一事不多作回應：「因為合約代言人嘅形象一定要健康，總之稍後會公布詳情。」而被傳搶Yumi飯碗的A.Lin，亦對事件不欲多談，但卻暗寸「有人」形象不健康：「無論係咪代言人，做藝人都要對自己嘅言行負責。」雖然Gamania與A.Lin大賣關子，不過Gamania網站近日已公布A.Lin為新代言人，Yumi被搶飯碗似乎已成事實。

文：專案組